Transmarikabolloak bazterretan topatzen dugu euskara ere
“Hizkuntza bat hitzekin osatzen da, baina ekimenek eraikitzen dute hizkuntza baten komunitatea”. Horrela hasten da 22. Korrikaren mezua. Komunitatea osatzeaz ondo dakigun kolektibokoak gara. Mugimendu transbollomarikak bere azalean bizi du hitzekin, siglekin osatzen den hizkuntza, eta hizkuntza horren bidez eraikitzen den komunitatea. Identitate propioetatik abiatuz, kolektibitate bat eraikiz.
LGTB hizkiak gure identitateak izendatzeko erabili ohi dira. Letra hauek hizkuntza baten parte dira, baina, sarri, hizki hauei lotutako ekimenek komunitate baztertzaile bat eraikitzen dute.
Bazterrekoak gara. Historikoki arbuiatuak izan garenon kolektiboan batu eta babestu gara. Baina merkatu hobi bihurtu gaituen kapitalismoak LGTB hizkiak bere egin eta irentsi egin ditu. Kapitalismoaren hizkuntzan, LGTB beharrean, G besterik ez da esaten, gay kolektiboaren G letra, alegia. Euren LGTB kontzeptuan lesbianek eta transek ez dute tokirik; noizean behin, akaso, ikusgarritasun interesatua eman ohi zaie, eta beti ere, ezkutuan iraun dezaten nahi duten barauen aurpegia zuritzeko asmo faltsu eta komertzialei jarraiki. Eraiki nahi duten komunitatea baztertzailea da erabat; gay, cis, zuri eta dirudun ez direnak sarbiderik ez duten komunitatea, hain zuzen. Bazterretakoak gara eta ondo dakigu zeintzuk diren kapitalismoak bazterretara eraman nahi dituen horiek. Bazterrekoak gara eta bazterretan ahaztutakoari altxatzen laguntzeko komunitatea da gurea.
Bazterrak nahasteko jaioak gara eta gure hizkuntza propioa dugu.
Berdin gertatzen da gure hizkuntzarekin. Pride-en antolaketetan dabiltzan antolakunde-enpresek gay, cis, zuri eta dirudun ez diren gainontzeko kolektiboei eskaintzen dieten esparru bera ematen diote euskarari. Gutxi batzuetan erabiltzen dute euskara eta beti ere aurpegia zuritzeko baino ez.
Sistema cisheterosexista honetan, trans-ak, bollerak eta marikak bazterretan gauden moduan, bazterretan topatzen dugu euskara ere. Transbollomarikok euskaraz eraiki nahi dugu komunitatea. Hizkiak falta zaion hizkuntza beti egonen da hankamotz eta denok sarbiderik ez dugun sistema beti izango da baztertzailea, ez da inoiz komunitate izango.
Hizkiek hitzak sortzen dituztelako, hitzek hizkuntzak eta ekimenek hizkuntza baten komunitatea, 22. Korrikan Trans ekintzaile gazteak egin nahi ditugu gure kilometroaren protagonista. Trans identitateak lehen lerrora ekarri eta mugimendu transbollomarikak dituen erronkei aurre egiteko trans-antolakuntza ezinbestekoa dela aldarrikatu.
309. Kilometroa trans kilometroa izango da, lekukoa trans ekintzaile gazteen esku geratuko da. Hitzekin eta ekintzekin, batzuetan korrika besteetan oinez, Gora trans mugimendua!
309. Km – TRANS KILOMETROA
APIRILAK 1 – 18,00etan
Euskal Herria/Loreto de Arriola
(Lakuako Telefonika eraikinean)