Aurre egin proiektu faxista patriarkalari

Gasteizko trans, ez bitar eta bollerak

Azken urteotan, feminismoak lortutako konkista eta eraldaketen aurrean, proiektu matxista bere burua olatu erreakzionario eta ultraeskuindar batean berrantolatzen ari da, eta horren ondorioak mundu osoan zehar ikusten ditugu. Olatu honek aurpegia, gorputza eta baita bizitza ere jartzera ausartu ziren feministen belaunaldiek lortutako aurrerapen guztiak desagerrarazi nahi ditu. Zis-hetero patriarkatuaren jarraitzaileek gure eskubideak desagerrarazteko aurkitu duten bide berria trans pertsonen aurkako erasoa da. Sexu-genero disidentzien aurkako erasoa.

Patriarkatuaren proiektu bio-esentzialistak, benetan oinarri zientifikorik ez duen arren, gizonen eta emakumeen arteko desberdintasunak naturalizatu nahi ditu; hau da, argudiatu nahi du biologiagatik emakumeak gizonak baino gutxiago garela. Horretaz gain, gure eskubideak defendatzeko, gure borroka feministan lagun ditugun trans pertsonak erauzteko proiektuan parte hartu behar dugula aldarrikatzen du. Guk proiektu hau salatzen dugu, izan ere, biologiak dioena alde batera utzita, biologiak giza aniztasuna erakusten duen arren (beraien argudioak deuseztatuz), gure eskubideak edozein teoria biologizistaren gainetik daude.

Erabat uko egiten diogu gizonen menpe jartzen gaituen edozein patu biologikoaren onartzeari. Gure lagun trans eta ez bitarrak erauztearen konplize ez dugu izan nahi. Gorroto-diskurtsoak eta diskurtso deshumanizatzaileak ez dira feminismoa. Are gehiago, ikusi ahal izan dugu, hainbat herrialdetan, trans eta ez-bitar pertsonen aurkako eraso bortitz eta hilgarriaren ondoren, gainerako kolektiboak, bollerak eta emakumeak izan direla hurrengoak. Pertsona trans eta ez-bitarren defentsa, beste hainbat borroka bezala, proiektu feministaren parte da, bizitzaren bizigarrien aldeko proiektua, gizarte berdinzaleagoak, bidezkoagoak eta indarkeriarik gabekoak eraikitzearen aldekoa.

Faxismoaren kontra AUSARDIA ETA ALIANTZA FEMINISTAK! Patriarkatu zis-heterozuzena irauli!