Ikusgunek Bernedoko Udalekuen aferaren ondoren antolatutako gorroto transfobikoaren kanpaina salatu du

LGTBI+fobiaren aurkako behatokiak, Ikusgunek, ohartarazi du kanpaina antolatu eta koordinatu bat jarri dela martxan Bernedoko Udaleku transfeministen inguruan sortutako polemikaren ondoren. Behatokiaren arabera, eskuin muturreko taldeek eta mugimendu transbaztertzaileek (TERF) elkarrekin jardun dute, pertsona transen aurkako kriminalizazio-diskurtsoak zabaltzeko.

Txostena sare sozialetan, hedabideetan eta foro digitaletan egindako aste beteko jarraipenaren emaitza da. Ikusgunek dioenez, “kasua aitzakia gisa” erabili dute sektore horiek gorrotoa pizteko eta desinformazioa hedatzeko.

Polemikaren harira sortutako azterketa

Behatokiak irailaren 25ean abiatu zuen ikerketa, kanpamentuaren inguruko lehen albisteak agertu zirenean. Une horretatik aurrera, sareak mezu transfobikoz bete ziren, eta Ikusgunek “ikerketa sakon eta zorrotza” egitea erabaki zuen, diskurtso horiek aztertzeko eta testuinguruan kokatzeko.

Aste batean zehar, 200 tuit baino gehiago aztertu zituzten, baita Instagram, TikTok eta YouTube-eko edukia ere. Ondorioz, aktore ultrakontserbadoreen, kontu faltsuen eta mugimendu transgorrotatzaileen sare koordinatua identifikatu dute, eskandaluaren oihartzuna handitzeko eta kolektibo transa erasotzeko helburuarekin.

 

Salaketa anonimo batetik linxamendu mediatikora

Txostenaren arabera, gertakariak abuztuaren 27an hasi ziren, Instagramen argitaratutako salaketa anonimo batekin. Hurrengo egunetan, El Común eta El Correo bezalako hedabideek tonu sentsazionalistako artikuluak plazaratu zituzten, eta hortik aurrera sareetan gorroto-mezuen uholdea etorri zen.

Ikusgunek jaso ditu pederastia-akusazioak, irain transfobikoak eta irudi manipulatuek hedatutako mezuak, LGTBIQ+ kolektiboa “haurren arrisku” gisa aurkezten dutenak. Gainera, elkarte antolatzaileko kide baten kontrako linxamendu publikoa azpimarratu dute: haren izena eta datu pertsonalak zabaldu zituzten, jazarpen kanpaina baten barruan.

 

Eskuin muturra eta TERF mugimenduak elkarrekin

Txostenak erakusten du eskuin muturrak eta feminismo transbaztertzaileak elkarrekin jardun dutela, mezu eta irudi berdintsuak erabiliz. Sare horiek nazioarteko estrategia bera jarraitu dute: haurren defentsaren aitzakiarekin gorrotoa eta bazterketa justifikatzea.

Ikusguneren arabera, kanpainan hiru ideia nagusi erabili dira:

• LGTBIQ+ eskubideak pedofiliarekin lotzea.
• Hezkuntza feminista eta transfeminista “doktrinatzat” aurkeztea.
• Aniztasun sexuala moralaren eta haurtzaroaren mehatxu gisa irudikatzea.

 

Ondorioak: gorrotoa antolatu egiten da

Behatokiaren ustez, Bernedoko aferak erakusten du ez dela gertakari isolatua, baizik eta gorroto-diskurtso antolatu baten parte. Dinamika horren helburua, Ikusguneren arabera, da “pertsona transen eskubideak higatzea eta indarkeria soziala justifikatzea”, moralaren defentsaren aitzakiarekin.

Behatokiak ohartarazi du mezu horiek gorrotoaren apologia izan daitezkeela legez, eta “adierazpen askatasunaren muga gainditzen” dutela askotan.
“Gorrotoa ez da isiltasunez garaitzen, baizik eta feminismo gehiagorekin, elkartasun sareekin eta aniztasunaren aldeko hezkuntzarekin”, ondorioztatu du Ikusgunek. Behatokiak adierazi du kasua monitorizatzen jarraituko duela, eta LGTBI+fobiaren biktimak laguntzeko konpromisoa berresten duela.

 

Txostena osorik: https://ikusgune.eus/files/2025/10/informe-eusk.pdf